Eph 6 | NdeIBE | STEP | Bantwana lalelani abazali benu eNkosini, ngoba lokhu kulungile.

Ephesians 6

Abantwana Labazali

1 Bantwana lalelani abazali benu eNkosini, ngoba lokhu kulungile. 2 “Hlonipha uyihlo lonyoko” – okungumlayo wokuqala olesithembiso – 3 “ukuze kukulungele lokuba ube lempilo ende emhlabeni.”

4 Boyise, lingabathukuthelisi abantwana benu, kodwa bondleni ngokufundisa langokulaya kweNkosi.

Izigqili Lamakhosi

5 Zigqili, lalelani amakhosi enu asemhlabeni ngenhlonipho langokwesaba, ngobuqotho bezinhliziyo, njengoba lingalalela uKhristu.

6 Lingawalaleli ukuba liwathokozise nje kuphela lapho elikhangele, kodwa njengezigqili zika-Khristu, lisenza intando kaNkulunkulu kuvela ezinhliziyweni zenu. 7 Sebenzani ngezinhliziyo zonke, kungathi lisebenzela iNkosi, hatshi abantu, 8 ngoba liyakwazi ukuthi iNkosi izavuza umuntu wonke ngenxa yokuhle akwenzayo loba eyisigqili kumbe okhululekileyo.

9 Lani makhosi phathani izigqili zenu ngendlela efanayo. Lingazisongeli, njengoba likwazi ukuthi lowo oyiNkosi yazo leyenu usezulwini, njalo akukho ukukhetha kuye.

Isihlangu SikaNkulunkulu

10 Ekucineni, qinani eNkosini lasemandleni ayo amakhulu. 11 Fakani isihlangu esipheleleyo sikaNkulunkulu ukuze lanelise ukumelana lamacebo kaSathane. 12 Ngoba kasilwi lenyama legazi, kodwa silwa lababusi, lemibuso kanye lamandla omhlaba lo ogcwele ubumnyama, silwe njalo lamabutho emimoya emibi emibusweni yasemazulwini. 13 Ngakho-ke fakani isihlangu esipheleleyo sikaNkulunkulu, ukuze kuthi lapho usuku lobubi lufika libe lamandla okugxila, kuthi lalapho selenze konke, lime.

14 Ngakho manini liqine, ibhanti leqiniso libotshelwe ngensimbi ekhalweni lwenu, lesihlangu sasesifubeni esokulunga sisendaweni yaso, 15 lezinyawo zenu zigqokiswe zalungiselelwa ngokuvela evangelini lokuthula.

16 Phezu kwakho konke lokhu, thathani ihawu lokukholwa elizacitsha ngalo yonke imitshoko evuthayo yomubi. 17 Thathani ingowane yokusindiswa lenkemba kaMoya, eyilizwi likaNkulunkulu. 18 Khulekani ngoMoya ezikhathini zonke ngezinhlobo zonke zemikhuleko lezicelo. Ngalokhu qaphelani liqhubeke kokuphela libakhulekela bonke abangcwele.

19 Lami lingikhulekele, ukuba kokuphela lapho ngivula umlomo wami, ngiphiwe amazwi ukuze ngitshumayele ngesibindi imfihlakalo yevangeli, 20 engingummeli walo ngibotshwe ngamaketane. Khulekani ukuba ngilitshumayele ngesibindi, njengokumele ngikwenze.

Ukuvalelisa

21 UThikhikhusi, umzalwane othandekayo loyinceku ethembekileyo eNkosini, uzalitshela konke, ukuze lani lazi ukuba nginjani kanye lalokhu engikwenzayo. 22 Ngimthuma kini ngalokhu, ukuba likwazi ukuthi sinjani, lokuze aliqinise.

23 Ukuthula kakube kubazalwane, lothando lokukholwa okuvela kuNkulunkulu uYise laseNkosini uJesu Khristu. 24 Umusa kawube kubo bonke abayithandayo iNkosi yethu uJesu Khristu ngothando olungapheliyo.